Mipatay sa minero gikasuha’g murder

CEBU, Philippines - Kasong murder ang ipasaka sa kapolisan batok sa duha ka minero nga  miunay og patay sa kauban  nila  sa trabaho didto sa bukirang bahin sa barangay Balaas lungsod sa Argao.

Ang  mga  suspetsado  kinsa nadakpan sa kapolisan   niadtong  Sabado sa ala 1:00 sa hapon   mao sila si Angelito Ejalon, 28, minyo, taga barangay Masa, lungsod sa Dumanjug ug mine maintenance sa usa ka coalmine ug ang kauban niini nga si Roman Montejo, 31 , minyo , ug  foreman usab sa maong minahan.

Si PO2 Renato Nacaytona sa Argao Police Station mibutyag sa Banat News   nga  ang duha gisikop  sulod  sa  ilang  trabahoan. Ang  asawa  sa gipatay  nga  si Ireneo Carillo,  maoy positibong miila   kang  Ejalon  nga  maoy  gikabangi  sa iyang  bana.

Dihang  giimbistigar  sa kapolisan  mitug-an si Ejalon  nga  siya’y  mipusil  kang  Carillo, samtang  si   Montejo  maoy  iyang back- up   hinungdan  nga gisikop  usab  dayon  kini  sa kapolisan.

Ang duha ka suspek  kinsa  nagtingkagol  na  sa prisohan  mag-atubang sa kasong  murder. Ang asawa  ni Carillo mitug-an sa mga polis  nga   nagkabikil  ug  ang  iyang bana  ug si Ejalon   bahin  sa ilang  motorsiklo   nga  giguba  sa suspek. Niadtong  Biyernes sa udto  miuli  sa Carillo  sa ilang balay  sakay  sa iyang  motorsiklo  kay  maniudto  dihang  gibanhigan  kini  sa mga suspetsado ug gipatay. (BANAT NEWS)