Lawas sa dagang guwang dugta na

CEBU, Philippines - Nag-anam  na  kadugta  ang  patay’ng  lawas  sa usa ka 70-anyos nga dagang guwang  dihang  napalgan  kini  sa iyang  mga kabanay  sulod sa iyang balay didto sa Sitio Tagasa,barangay Poblacion, sa lungsod sa San Remegio sa miaging Sabado  sa buntag.

Si Macrina Seraffin Tudlasan, 70, nag-inusarang  nagpuyo  sa iyang  balay.

Si PO3 Jose Ylanan sa San Remegio Police  Station  mibutyag   sa Banat News  nga katapusang  nakit-an  sa  mga  kabanay  si  Tudlasan  nga  nanilhig  sa iyang  tugkaran  sa miaging  adlaw.

Apan  niadtong Biyernes sa gabii nakapanimaho  og patay    ang mga silingan niini gikan  sa balay ni  Tudlasan hinungdan  nga  niadtong  Sabado  sa buntag, gisusi  nila  unsay nabaho  sa sulod  sa balay  sa biktima. Apan  sa ilang  pag-abli  sa pultahan maoy  misugat  kanila  ang  grabe  kabahong patay   ug  sa ilang  pagsulod  nasuta  nila  nga  gikan  kini  sa lawas  ni Tudlasan  nga  naghigda  sa katre  nga  nag-agus  na  ug  nag-anam  na  kadugta.

Ang mga kabanay niini mipalubong  dayun sa  maong patay’ng lawas tungod sa kabaho  nga peligro  kaayo  nga   makadaut na sa panglawas sa tawo.

Gituohan  nila  nga  namatay  sa ordinaryong  sakit  ang  biktima  kay  may  higayon  nga  mireklamo  kini  nga  sakit  ang  iyang  tiyan  nga  maoy  malagmit  hinungdan  sa kamatayon  niini.

Nasuta   sa mga kabanay  ug  sa mga silingan  nga  walay  foul play  ang  kamatayon  sa biktima. (BANAT NEWS)