Driver gipahimangnoan inig-agi sa 2nd bridge

CEBU, Philippines - Gipahimangnoan sa kadagkoan sa trapiko sa dakbayan sa Lapulapu ang mga motorista nga molabay sa Marcelo Fernan Bridge  nga  mag-amping  ning  nagpadayon  nga pag-ayo karon sa maong taytayan. Si Frank Brazil nga maoy pangulo sa City Traffic Management System (CTMS) sa dakbayan sa Lapulapu  mibutyag  sa  mga  tigbalita nga piligro kaayo ang pag-agi niining mga panahona  sa nahisgutang  taytayan  ilabi  na  nga gisugdan  na  ang  pagpangukal  sa  mga  daang  aspalto.

“We are reminding all the motorists especially the motorcycles to drive carefully when reaching the scraped road to avoid accident,” nagkanayon si Brazil sa iyang pamahayag.

Padayong gipahimangno ni Brazil sa mga motorista  nga  ang  pagtrabaho  magsugod na sa alas 10:00 ang takna karong gabii hangtod  sa alas 6:00 ang takna sa buntag.

Dugang pa niya nga gipahimutang na nila ang mga signages ug barriers sa maong lugar   nga  maoy  mogiya   sa mga motorista  aron kalikayan ang  aksidente.

Gitataw niya nga base sa iyang nahipos nga kasayuran gikan sa kadagkoan sa Department of Public Works and Highways (DPWH) 7 nga kun wala’y kakulian nga masinati niining  ilang  pag-ayo  sa second bridge labing siguro nga mahuman kini sa dili pa ang tunga-tunga nga bahin  sa Abril.

Gumikan sa pag-ayo sa Marcelo Fernan Bridge gipaabot ang pagdasok na usab sa daghang pasahero nga mosakay sa ferry boat gikan Mulle Osmeña sa barangay Poblacion sa dakbayan sa Lapulapu   nga  modunggo sa Pier 3 sa dakbayan sa Sugbo.

Si Rics Assuncion nga maoy port supervisor miingon nga ilang giandam na daan ang ilang mga ferry  boat ning  gipaabot  nga  pagdaghan  sa  mga  mosakay  nga  pasahero  sama  sa  mga  estudyante  ug  mga  trabahante  ug bisan  mga  negosyante. (BANAT NEWS)