Pagpaubos sa bayad sa terminal fee sa CSBT may politika?

CEBU, Philippines - Gitumbok ni One Cebu Gubernatorial Candidate 3rd District Cong. Pablo John PJ Garcia nga dako ang kawad-on sa lalawigan sa Sugbo sa gihimong paglaslas ni Vice Gov. Agnes Magpale sa terminal fee diha sa Cebu South Bus Terminal gikan sa 200 pesos ngadto sa 150 pesos nga terminal parking fee sa matag bus  nga mosulod.

Sumala pa ni Garcia nga gibanabanang otso milyones pesos ang mawala nga revenue sa South Bus terminal sa usa ka tuig sa pagpatuman ni Magpale sa maong           polisiya.

Iyang gitataw nga wala matarong og pagtuon ang gipakanaog desisyon sa acting gobernador tungod kay gikinahanglan man untang kwentahon ang gastohan alang sa maintenance sa nahisgutan nga terminal.

Naklaro niini nga ang tinguha sa maong lakang mao ang pagkuha sa suporta sa mga bus operators human sa giingong pagpadayag sa pipila ka mga bus operators nga gisuportahan niini ang pag-minus sa parking fee sa mga bus diha sa maong terminal.

Hinoon iyang gibutyag nga sa gihimo sa iyang igsoon nga si Gov. Gwen Garcia nga paglibkas ang pagsingil sa terminal fee nga tag 5 pesos, daghan ang nalipay nga mga pasahero dili lang dinhi sa lalawigan.

Apan kung pagtangtang sa P5 nga terminal fee sa mga pasahero gikalipay, ang mga bus operators ug bus drivers mao say nahan-ukan dihang gipatas-an ngadto sa P200 ug P150 gikan sa P150 ug P100 ang terminal fees.

Sa pagkakaron, wala nay gisingil ang CSBT gikan sa pasahero ug gibalik na sa karaang bayranan sa terminal fees ang gikolekta tungod sa hulga sa mga bus operators nga ilang i-implimentar ang nalatid nga fare increase sa Land Transportation and Franchising Regulatory Board.

Ang maong increase rate wala tumana sa mga bus operators sukad nga kini gimando kapin duha ka tuig na ang milabay. (BANAT NEWS)