Minibus ug motor dungan nag-overtake nagsampok sa dalan, drayber sa motor pisat
CEBU, Philippines - Ulo sa 29-anyos nga ulitawo nalatayan sa gikadasmagay niining minibus samtang kini nagmaneho og motorsiklo diha sa highway sa barangay Tuyan sa siyudad sa Naga kagahapon sa alas 12:00 sa sayong kaadlawon.
Ang biktima nga patay diha-diha mao si Marciano Paradero Basalo, 29, molupyo sa barangay Kantao-an siyudad sa Naga.
Samtang ang drayber sa minibus nga dunay rota nga Carcar-Cebu gimaneho ni Cornilio Calinawan, 33, taga lungsod sa San Fernando.
Matud ni PO1 Rodjie Alicaway sa Naga City Police Station dihang nahinabi sa Banat News paingon sa siyudad sa Sugbo ang biktima ug kasugat niini ang minibus.
Sumala pa sa mga nakasaksi ngadto sa imbestigador, mi-overtake si Basalo sa gisundang sakyanan apan naatlan nga ni-overtake usab ang minibus sa gisundan usab niining sakyanan ug ang duha nagsampok tunga-tunga sa dalan.
Matud ni Alicaway naguyod pa ang motorsiklo human napasok sa ilawom uban si Basalo hangtud nga kini nabuwag ug nalatayan sa luyo nga ligid.
Gihikay na ang kasong ipasaka sa maong minibus drayber. (BANAT NEWS)
- Latest
