CCMC padawaton na’g estudyante sa gawas
CEBU, Philippines - Adunay sugyot nga ang Cebu City Medical Center (CCMC)-College of Nursing padawaton na og mga tinun-an nga gikan sa mga dapit gawas sa dakbayan kay nihit na ang mga mikuha og nursing nga gikan sa dakbayan sa Sugbo.
Apan ang sugyot ni Konsehal Roberto “Bob†Cabarrubias wala dayon aprobahi sa konseho tungod sa kabalaka sa ubang konsehal nga basin moabot ang panahon nga ang mga taga dakbayan mao na hinoon unya ang dili maka-eskwela.
Ang statistics nagpakita nga gikan niadtong 2003, nag-anam og us-os ang gidaghanon sa mga tinun-an nga mikuha og nursing diha sa CCMC-College of Nursing tungod kay ang maong kurso dili na usab kaayo “in demand†sa ubang kanasuran.
Matud ni Cabarrubias nga kaniadtong 2003, aduna pay 442 ang mikuha og nursing sa CCMC, apan nag-anam kini’g kahibos hangtud nga sa miaging tuig, 151 na lang ka tinun-an nga gikan sa dakbayan ang mipa-enrol.
Dihay higayon nga usa ka tinun-an sa CCMC-College of Nursing nalakip sa “Top Ten†sa Nursing Licensure Examination.
Matud ni Mayor Michael Rama nga bisan siya dili dayon makasanong nga pasudlan na og taga gawas sa dakbayan nga motungha diha sa CCMC-College of Nursing.
Adunay ordinansa ang dakbayan nga ang katunga ra sa tuition fees sa mga tinun-an sa CCMC-College of Nursing maoy ilang bayran kay ang laing katunga abagahon sa dakbayan sa Sugbo. (/WC) (BANAT NEWS)
- Latest
