Internetan ug canteen sud sa Cebu City dormitory nasakpan

CEBU, Philippines - Nasakpan sa mga sakop sa City Treasurer’s Office ang usa ka internet cafe sulod sa Cebu City Hillyland Dormitory diha sa Natalio Bacalso Avenue nga walay business permit.

Ang report ni City Treasurer Emma Villarete nagkanayon nga nasuta sa mga sakop sa Business Tax Mapping and Inspection Division nga ang internet cafe gi-operate sa usa ka barangay kapitan kansang pangalan gipugngan una sa Banat News hangtud di kakuhaan og pamahayag.

Ang opisina ni Konsehal Margarita “Margot” Osmeña maoy unang nakadawat sa maong impormasyon bahin sa illegal nga operation sa internetan mao nga gisusi kini sa Tax Mapping team.

Si Arnulfo Apurado nga maoy inspector nga gipadala ni City Treasurer Villarete mitaho nga nahimutang kini sa ground floor kilid sa Admin Office.

Pag-adto gani nila ni Apurado ila g’yud nga nasakpan nga dunay mga bata nga nagduwa ug nakuhaan pa nila og hulagway. Dunay 12 ka computer units nga “coin-operated” nga nagpasabot nga kadtong mogamit mohulog lang og sensiyo usa pa kini magamit.

Gawas sa internetan, duna pa’y canteen nga nag-operate gihapon sulod sa mao nga city condominium.

Atol sa inspection sa miaging Marso 6, ang tagdumala sa internetan ug canteen walay napakita nga business permit maong miisyu ang CTO og Notice to Comply. Si Mayor Michael Rama miingon nga kinahanglan g’yud nga adunay business permit ang canteen apan matud niya ang pagbutang og internetan makaayo sa mga tinun-an kay dili na sila molakaw og layo aron mangita’g internet cafe.

Apan wala na mokomentaryo si Rama kun makiangayon ba nga ang dakbayan maoy mobayad sa kuryente sa internetan nga unta gi-operate man kini sa maong opisyal. (BANAT NEWS)