17-anyos nadakpang nagdala og armas

CEBU, Philippines - Arestado ang usa ka 17-anyos tungod sa paghupot og .357 nga armas nga walay lisensiya samtang nagsuroysuroy kini sa Public Plaza sa barangay Sta. Cruz sa lungsod sa Balamban niadtong niaging alas 4:45 sa kaadlawon.

Ang batan-on hayan pasakaan og kasong paglapas sa Comelec gun ban ug illegal possession of firearms. Dunay sud nga lima ka buhing bala ang armas nga nakuha gikan sa suspek.

 Matud ni PO3 Jose Baldecasa sa Balamban Police Station dihang nahinabi sa Banat News usa ka sakop sa civilian volunteer organization ang nakamatikod sa nagbagal nga armas sa suspek ug gitug-an dayon ngadto sa mga polis.

Ang suspek anaa na karon sa Social Welfare Office sa lungsod aron mao nay moasikaso kung mapasakaan ba kini og kaso. (BANAT NEWS)