Duha ka “salvor” nalumos
CEBU, Philippines - Duha ka “salvor†ang nalumos kagahapon sa buntag pasado alas- 6 diha sa kadagatan sa Canjulao dakbayan sa Lapu-lapu.
Ang mga nalumos mao silang Alger Sumaylo, 27, ug Glenn Pahit, 27, mga salvor sa Omega Steal and Marine Services. Ang trabaho sa duha mao ang pagpalutaw o ba kaha pag-ugkat sa mga nalunod nga barko.
Ang Banat News diha sa dapit dihang nakuha ang patay’ng lawas ni Sumaylo sa ilawom sa barkong ilaha gihinay-hinayan og putol.
Buwan sa Hulyo sa miaging tuig nalunod ang MV B and A nga adunay kargang 22 mil ka sakong semento.
Kagahapon sa buntag nasigpatan ang patay’ng lawas ni Sumaylo nga nasangit sa ilawom nga bahin sa barko.
Ang Coast Guard Mandaue Detachment mipadala og mga divers aron kuhaon ang duha sa ilawom sa dagat. Pasado ala-una sa hapon, nakuha sa Coast Guard divers ang lawas ni Sumaylo apan si Pahit nga atua pa sa ilawom nga bahin sa barko ,naugkat pasado alas-4 na sa hapon.
Sayo niini, ang amo sa duha nga si Aurelio Pitogo miingon nga ang duha maoy gibilin aron bantayan ang barko sa tibuok gabii.
Apan nianang pagkabuntag, nahibulong sila nga wala na ang duha ug sa ilang pagsusi sa dapit ilang nasigpatan ang patay’ng lawas ni Sumaylo sa ilawom.
Sumala pa ni Pitogo nga nangyawat ang duha pagsawom sa mga pinutol nga puthaw bisan wala silay mga gamit.
Matud pa ni Coast Guard Station Commander Mandaue Detachment Edilberto Amor nga adunay tulobagon ang amo sa duha kun mahuman na ang ilang imbestigasyon. (BANAT NEWS)
- Latest
