Kabit Sa Asawa Gipatay Sa Bana

CEBU, Philippines - Gihubog pagkahuman gidunggab patay ang 40 anyos nga ulitawo sa bana sa babayeng minyo nga giingong  gikabit   niini didto sa barangay Anapog sa lungsod sa San Remegio niadtong Martes sa alas 2:30 sa hapon.

Ang biktima mao si Jimmy Manatad, kapin 40 anyos ang panuigon, ulitawo ug nagpuyo sa maong lugar.   

 Samtang ang suspek mao si Ernie Edano, hingkod, minyo, bana sa babaye nga kabit sa biktima ug nagtrabaho isip construction worker dinhi sa dakbayan sa Sugbo.

Si SPO4 Mario Revilla sa San Remegio Police Station mibutyag sa Banat News   nga ang biktima   giingong  dugay  na  nga nagduda  sa  hinayop  nga relasyon   sa  iyang asawa  ug   biktima  hinungdan  nga nagdali kining mipauli gikan sa iyang trabaho niadtong Martes  sa  buntag  human  madawat  niini  ang  text  sa iyang igsoon  nga nagpahibawo  bahin  sa bisyo  sa iyang  asawa.

Matud pa, sa  pag-abot sa suspek  sa ilang balay gipangita dayon niini ang biktima ug dihang nagkita sila iya kining gi-amigo og maayo ug gibangkahan og inom.

Apan dihang nahubog na ang biktima gihatud kini sa suspek sa pinuy-anan niini,apan pag-abot nila sa mingaw nga lugar didto gidunggab kini makatulo ka higayon sa liog ug baba nga pulos milapos   sa  likod  nga  nagpakita sa tumang kalagot.

Human  masiguro  nga   dili  na  mabuhi  ang  biktima, dali kaayo  kining  nakasirit  pahilayo  sa maong  lugar ug wala  na  hiabti  sa kapolisan  nga  miresponde  sa maong  alarma.

Ang kapolisan igo na lang sa pagpanghipos   sa  detalyi   sa maong  hitabo  gikan  sa mga silingan ug paryinte tungod kay naglisud sila  sa pagpakighinabi sa asawa sa suspek kay gihulagway kini nga  adunay deperensiya sa panghuna- huna ug dili makaestorya og tarong. (/WC)(BANAT NEWS)