Pagkuyanap sa Cyber bullying gikabalak-an

CEBU, Philippines -  Ang   kagamhanan  angay  nga  mohimo  og  paagi  aron  mapakgang  ang pagkuyanap  sa cyber bullying  kon  pagpakauwaw  pinaagi   sa social media   karong  panahona.

Mao  kini  ang  giawhag  ni  Dr. Purie Oñate, kanhi presidente  sa  Philippine Psychiatric Association (PPA) atol  sa Kapihan  sa PIA  nga  gipalanog  usab  sa DYMR  kagahapon.

Si  Oñate hinuon nagkanayon  nga  kining  maong problema  nga  gipasiugdahan  sa  mga  batan-on nga kasagaran anaa  magtungha  sa high  school  dili  mapiog  kun  ang  kagamhanan  mao ra  ang  mangusog  sa  pagsumpo  niini.

Miingon  siya  nga  dako kaayo  og kaakohan  ang  mga  ginikanan  aron makatabang  sa pagpitol  sa kinaiya  sa ilang  mga anak  nga  nakakat-on  na  sa pagpanaot  sa iyang  isig-kaingon   pinaagi  sa social  media sama sa Facebook, Twitter, cellular phone  o  sa  uban  pa  sulod  sa internet. Matud  pa  ni  Oñate  nga sa  iyang  kasinatian  sukad  modagsang  ang  social  media  outlet  dinhi  sa nasud,  kasagaran  sa  mga  mabiktima  sa cyber bullying  mao  ang  mga  babaye.

Unya  mga  babaye  ra  usab  kasagaran  ang  tinubdan  niining  maong  problema  tungod  sila  kanunay  ang  taas  og  higayon  ug  kugihan  manglibak  ug manaot  sa ilang  isigkaingon  pinaagi  sa internet.

Samtang  si  Dr. Glenda Bacasmas  sa Philippine  Mental Health Association (PMHA) nagkanayon  nga  ang  ilang  ikatabang  sa kagamhanan  mao  ang  pagpahigayon  og  mga lektura  sa  eskuylahan  aron  ipahibawo  ngadto  sa  mga  estudyante  ang  kangil-ad niining  manaot  pinaagi  sa pagpanglibak  sa  internet.

Kini  tungod  kay  moepekto  kini  sa mentalidad  sa  mga  mabiktima  ilabi na kadtong  putong  og  hunahuna  nga  mahimong  sa paghunong  nila  sa pag-eskuyla  tungod  sa kauwaw  nga  ang  ilang  dungog  gipakauwawan   pinaagi  sa social  media.

Hinuon  usa  sa  epektibong  iyang  gisugyot  ngadto  sa  mga  hingtungdan  nga  angay  lig-onon  ang  hunahuna  ug  mobarug  nga may  kaligdong  pinaagi  sa pagbaliwa  sa maong  pamugalbugal  kaniya.

Alang  kang  Bacasmas  nga  dili  na  kinahanglang  iya  pang tutokan  sa pagbasa  ang  makita  niya  nga  libak  sa iyang  Facebook  aron  manimawos  kundi  ang  pagpapas  niini  dihadiha  usa  sa  maayong  paagi  aron  dili  na  niya  hunahunaon. Kini  tungod  kay  matud  pa  ni  Bacasmas  kadtong  midaot  kaniya  moabot  ang  higayon  nga mapul-an  kini  ug  mohunong  sa ilang  kabuang.

Sa  ingon  usab  niini makita  ug masukod  ang  kalig-on  sa gidaot  nga  usa  usab  sa mahimong  barahan  nga  angay  silang  mahimong  lider  politikanhon tungod  kaantigo  sila  modala  sa ilang kaugalingon  nga  dili  matandog  sa unsa  man  nga  mga  panaugdaog  nga  gihimo  sa ilang pagkatawo. (BANAT NEWS)