Gitigbas sa silingan lawas nabulit sa samad

CEBU, Philippines - Nabulit sa mga samad ang kalawasan sa usa ka tawo nga gitigbas sa iyang    silingan sa Sector 5 sa barangay Pagsabungan, dakbayan sa Mandaue  sa miaging gabii.

Ang biktima mao si Jordan  Perales, 31 , minyo ug  nagtrabaho isip driver sa delivery truck sa pabrika sa katol sa maong dakbayan ug ang nagtigbas mao si Ronald Navotas, 28 , ulitawo  kinsa  truck boy sa maong pabrika. Si PO2  Richard  Ares sa kapolisan sa maong lungsod nga nahinabi sa Banat News miingon nga   matud  pa  sa   biktima   nga ang suspetsado nga si Navotas adunay kuyog nga laing lalaki apan wala na niini mailhi  dihang  gihabas siya  sa sundang  niini.

Nasayran  nga ang  biktima naglakaw   pauli sa iyang  balay gikan sa iyang trabaho apan sa paghidangat sa ngitngit nga bahin sa maong dapit kalit lang mitumaw ang suspetsado  nga  may  kaubang  lalaki  nga wala  hiilhi nga iyang gituohang nag-atang daan  kaniya didto  sa maong dapit.

Unya  walay  daghang  estorya  gihapsan dayon  siya     sa sundang  hinungdan  sa  pagkabad  og  dagan  sa biktima.       

Dihang  nahagba  ang  biktima  sa yuta , ang suspetsado  dali kaayong  nakasibat samtang  ang  kapolisan  padayon  pa  sa ilang  pagpangita sa suspetsado. (BANAT NEWS)