Estudyante misukol sa tulisan napusilan

CEBU, Philippines - Tungod sa IPhone napusilan ang usa ka tinun-an sa Cebu Institute of Technology University  sa dalan Salvador barangay Labangon ,dakbayan sa Sugbo  sa miaging  gabii.

Ang biktima nailhan nga si Ralene Lagudas, 19, taga Poblacion, lungsod sa Sibonga, estudyante  sa BS Architecture sa CIT-U.

Usa ka Alcher Cañas nga molupyo sa maong dapit  maoy  mibutyag  sa kapolisan   nga  miingon  nga  sa sinugdan  nagtuo  siya  nga  manag-uyab  ang nag-away hinungdan nga iya  kining  gisinggitan og   ‘Hoy!’ apan dihang  iyang  gisusi  naghayang na  ang  biktima   sa yuta  nabulit  sa  dugo  ang  lawas.

Nangayo   dayon  siya og tabang  sa paghatud  sa biktima  ngadto  sa  Miller Hospital.

Dugang pa ni Cañas  nga  mingaw  ug  ngi-ob  kaayo  ang  maong  lugar   ug  daghan na  ang  natulisan  sa maong dapit.

Samtang si PO3 Robert John De Castro sa Police Station 10, mibutyag  nga ang biktima nakaangkon og samad pinusilan sa iyang tiyan nga misaka  sa  dughan ug  ang  bala milusot sa kilid nga bahin sa iyang lawas.

Matud pa ni De Castro nga sa ilang inisyal nga imbestigasyon ilang nasayran nga ang biktima nagbaklay sa maong dapit dihang giingong gisundan kini sa duha ka lalaking luwan sa usa ka motorsiklo.

Dugang pa ni De Castro nga dihang naabot ang biktima atubangan sa usa ka internet sa maong lugar   giduol  kini  sa backrider   kinsa  mideklarar  nga tulis. Ang biktima nagdumili sa paghatag sa iyang cell  phone hinungdan nga nag-linayogay   kini  ug  ang  tulisan  apan dihang natumba silang duha, ang suspek nakahigayon  sa pagluthang  sa biktima.

Gani,  nabuslot   ang  sira sa  pultahan sa usa ka internet cafe human maigo sa pagpabuto  sa   tulisan  ngadto   sa biktima. (BANAT NEWS)