Sa Liloan, kanhi polis, batabata nadakpan sa PDEA
CEBU, Philippines - Usa ka kanhi polis ug bata-bata niini nasikop atol sa gipahigayong buybust operation sa Philippine Drug Enforcement Agency pasado alas- 6 sa miaging gabii diha sa Bag-ong Dan lungsod sa Lilo-an.
Si Rodelo Pilapil Jr. nga kanhi polis ug Jeffrey Otaza nga giingong iyang bata-bata ang nasikop sa mga sakop sa PDEA-7. Ang tigpamaba sa PDEA Jessie Tabanao, miingon nga nakadawat sila og reklamo batok sa maong polis nga pirmeng armado kun mamaligya og ginadiling drugas sa dapit.
Human sa surveillance sa PDEA gilusad dayon ang buybust operation apan matud pa misuway pa og ikyas si Pilapil pinaagi sa pagpabuto sa iyang armas ug mikaratel og dagan.
Nadakpan ra gihapon kini sa mga ahente lakip na si Otaza.
Matod pa ni Tabanao nga adunay mitumaw nga tensyon dihang gibabagan sila sa mga tawo.Dugang pa ni Tabanao nga anaa sa level 3 drug pusher ang duruha. Nakuha gikan sa duha ang kalibre .45 nga adunay tulo ka bala, usa ka medium pack nga gibana-banang mokabat sa 7, 500 pesos ug laing upat ka gagmay’ng pakete sa gituohang shabu. Si Otaza mihimakak nga siya adunay kalambigtan sa maong illegal nga buhat. “Nagluto ra man ko ngadto, naa may mibuto naratol ko midagan ko’g apil, gidakop man hinuon ko,wala ko kahibaw anang tunol-tunol oy,†pasabot pa ni Otaza.
Samtang nagdumili usab si Pilapil sa paghatag og komento kalabot sa iyang partisipasyon sa maong operasyon. (BANAT NEWS)
- Latest
