Bangsamoro partnership forum himuon sa Cebu
CEBU, Philippines - Usa ka partnership forum ang ipahigayon karong adlawa sa Cebu Grand Convention Center kabahin sa Bangsamoro Framework Agreement.
Kini gipanguluhan sa National Commission for Muslim Filipinos (NCMF) 7 diin gibana-banang 250 ka tawo ang gipaabot nga motambong.
Si NCMF 7 Regional Director Malo Manonggiring namahayag nga mahinungdanon kini tungod kay ang mga kaayuhan ug benepisyo nga makuha sa mga Muslim pinaagi sa framework agreement nga gipirmahan niadtong Oktubre 15, 2012 tali sa gobyerno sa Pilipinas ug sa Moro Islamic Liberation Front (MILF) ang hisgutan. “This partnership forum is very important because all their questions about the agreement will be answered since we have speakers from both parties that signed it,†matud ni Manonggiring.
Si Presidential Assistant on Muslim Concerns, Yasmin Busran-Lao maoy morepresentar sa gobiyerno sa Pilipinas samtang si Bangsamoro Development Authority chairman Dr. Safrullah Dipatuan mao ang mobarog alang sa MILF. Gipili sa komisyon ang Central Visayas nga dinhi ipahigayon ang maong pulong tungod kay adunay sobra na sa usa ka gatos ka libo ka mga Muslim nga nagpuyo dinhi.
Matud sa NCMF 7, dunay gibana-banang 122,504 ka mga Muslim nga ania sa Central Visayas ug 60,000 niini kasamtangang nagpuyo sa Sugbo.
“Which is why we need to consult those presently residing in Central Visayas. Because they will still be directly be affected by the Bangsamoro Agreement,†gipasabot ni Manonggiring.
Ang 14 ka palid nga gipirmahang agreement naglatid nga ang Bangsamoro aduna na unya’y kaugalingong justice system nga naglangkob sa lain-laing tradisyon ug naandan sa nagkadaiyang mga indigenous peoples sa Mindanao.
Magpabilin gihapon sa gobyerno sa Pilipinas ang defense and external security, foreign policy, trading, monetary policy, citizenship ug nationalization, ug postal service. (BANAT NEWS)
- Latest
