Mga batan-on tigsingil sa kalas sa sugalan

CEBU, Philippines - Mga menor de edad giingong gihimong kalasero diha sa usa ka pasugalan sa sitio Lemonsito, barangay Dumlog, dakbayan sa Talisay.

Apan matud ni Kapitan Charles Basillote kinsa presidente usab sa Association of Barangay Captain (ABC) sa konseho sa Talisay nga walay sitio Lemonsito diha sa iyang barangay. Hinuon ang kapitan mipasalig nga susihon niya ang maong report.

Niadtong Lunes sa hapon si Jebee Binghay sa Department of Social Welfare and Development (DSWD) sa main office ang mitawag sa Talisay City Police Station ug mi-report kabahin sa maong insidente.

Giingong dunay ilegal nga sugal nga gipahigayon sa usa ka balay diha sa sitio Lemonsito barangay Dumlog ug giingong mga menor de edad ang gihimong kalasero.

Si Inspector Margienette Yosores sa Women and Children Protection Desk sa Talisay City Police Station nga nahinabi sa Banat News kagahapon nagkanayon nga susihon niya ang maong report ug panid-an nila kini.

Sa laing bahin, kahinumduman nga si Basillote mibutyag nga dunay nag-operate og masiao diha sa ilang lugar ug gipanid-an nila kini.

Apan ang maong operator sa masiao abtik usab kaayo kining maniid ngadto sa mga opisyal sa barangay aron dili masikop.

Si Basillote kagahapon nagkanayon nga nangayo na siya og tabang sa mga polis aron sa pagpaniid sa maong operator og masiao diha sa ilang barangay aron kini masikop ug mahunong na ang maong ilegal nga sugal. (BANAT NEWS)