Pangampanyang lokal sugdan sa Marso 30

CEBU, Philippines - Gumikan kay  natumong  sa Biyernes  Santo  ang Marso 29, nakadesider  ang  Commission on Elections (COMELEC)  sa pag-uswag ngadto sa  Marso 30, ang  opisyal  nga  pagsugod  sa kampanya  sa  mga  lokal  nga  kandidato  alang  sa piniliay  sa Mayo 13, 2013.

Ang  pag-usab  sa maong  petsa gipahibawo ni  Comelec Chairman Sixto Brillantes  nga  gikonpirmar  usab  sa  mga lokal  nga  opisyal  sa Comelec  dinhi  sa Sugbo  ug  sa rehiyon 7. 

Gumikan  niini  ang  mga  kandidato  sa  pagka-kongresista, gobernador sa lalawigan, board member, mayor ug  mga  konsehal   sa siyudad ug  lungsod, unya  na  sa Marso  30  makasugod  nga  opisyal  sa paglusad  sa ilang  kampanyang  politikanhon.

Apan  luyo  niining  maong balaod  sa Comelec, nakadawat og daghang  mga  reklamo  bahin  sa  mga kandidato  nga  bisan  wala  pa itugot  ang  pangampanya, may   mga  politiko na nga  nag-una-una    sa  ilang  pangampanyang  politikanhon.

Hinuon  gitin-aw  ni  Regional Director Timmie Lambino  sa Comelec 7  nga samtang  wala  pay  campaign period  dili  pa  makonsiderar   nga kandidato  ang  usa  ka  tawo  bisan  nakasang-at na  kini  sa iyang  certificate of candidacy.

Matud  pa  ni Lambino  nga  mao kini  ang  nahimong  depensa  sa  mga  tang-an  nga  politiko.

Busa  bisan  may mosang-at  og  kiha  batok kanila  dili  sila madutlan  gumikan  sa maong  balaod, sumala  ni  Lambino. (BANAT NEWS)