Nahiubos sa kapuyo naghikog

CEBU, Philippines - Migahi  na  ang  lawas   sa usa ka  lalaki  nga  naabtan  sa  mga  ginikanan  sulod  sa iyang  lawak  diin  kini  maghikog sa  sitio Purok 3, Lower barangay Camputhaw,  dakbayan sa Sugbo  sa miaging gabii.

Ang naghikog mao si Alvin Casas, hingkod,  ug molupyo sa maong lugar kinsa  giingong  wala  magkasinabot  ug  ang  iyang  kapuyo nga  si Felomina Elegino, hingkod.

Sa inisyal nga imbestigasyon sa kapolisan nasayran nga ang ginikanan ni Casas natingala tungod kay dihang gitawag kini, wala   na  manumbaling.

Gani, unang mitawag niini mao ang inahan nga si Lita sa  pagtuo  nga  didto  sa  sulod  sa lawak  niini  ang ilang anak  sa taas  nga  bahin  sa ilang  balay.  Tungod  kay  wala  silay  tubag  nga nabati  gikan sa  ilang  anak, gisaka  kini  nila  ni  Lina  ug  ni Alex  nga  iyang  bana    ug  gipugos  pag-abli  ang  pultahan  sa lawak  niini.

Unya hilabihan   nga kakurat  sa magtiayon  dihang  maoy  misugat  sa ilang  panan-aw  nga  nagbitay  na  ang ilang  anak  nga  gahi  ug  bugnaw  na  ang  lawas  niini.

Nakita nila  ang  pisi  nga  gibulibod  sa liog  niini kansang  tumoy  gigaid  sa ilang sagbayan.

Nasayran sa kapolisan nga si Casas  ug  ang kapuyo  niini  gikatahong adunay ‘misunderstanding’ ug gituohang  kahiubos  ang  hinungdan  sa maong  paghikog.  (BANAT NEWS)