Gihabas sa lagaraw lawas nabulit sa samad

CEBU, Philippines - Nabulit sa mga samad ang lawas sa usa ka tawo nga gihabas sa lagaraw   sa  iyang  silingan sa  Purok Agbate, sa sitio Tiwasan,  sa barangay Catarman, lungsod  sa Liloan sa miaging  hapon.

Ang biktima mao si Mario  Garosa, hingkod, minyo, samtang  ang suspetsado   nailhan  usab  nga  si Billardo Napolis  Benting, 37, ulitawo,  nga silingan  sa biktima.

 Matud pa ni PO3 Jesson Gayo nga nahinabi sa Banat News nga nag-inom ang duha ka managsilingan sa sulod sa usa ka videokehan   sa ilang  lugar ug   dihang  nangalasbag  na nagpalabwanay  na  sa ilang  abilidad  sa pagkanta  sa  videoke  hangtud  nga  nagkalalis.  Dugang pa ni PO3 Gayo  dihang  miinit  ang  lalis  sa duha,   kalit  lang  mibiya  ang  suspetsado  kay  miuli  sa ilang  balay.

  Apan  dali kaayo  kining  nakabalik  sa  videokehan  nga  ilang giinoman  nga  nagdala  na  og  lagaraw,  matang  sa hinagiban nga  panglampas  sa sagbot.

Pag-abot niini  naabtan  ang  biktima  nga  nagdungoy  gumikan  sa kalasbag  ug  sa walay daghang  langas, kalit  nga  gihabas sa  iyang  lagaraw.

Gumikan  kay  naglisud  sa pagdagan,  mihutlay  ang  biktima  dihang  nasabak   ang  nagkadaiyang  bahin  sa lawas  niini  agi  sa lagaraw.

Dali nga gitabang sa mga silingan ang biktima ug gihatod ngadto sa Vicente Sotto Memorial Medical  Center (VSMMC) sa dakbayan sa Sugbo   diin padayon kining giatiman sa mga doktor.

Ang suspetsado matud pa ni PO3 Gayo wala na nila makita sa   balay  niini  ug ilang gituohan nga nakalayas  na  kini  sa laing  dapit  nga  maoy ilang  gipangita  karon. (/WC) (BANAT NEWS)