Radaza uyon sa ikatulong taytayan

CEBU, Philippines - Uyon si Lapulapu City Mayor Paz Radaza sa  tukorong  ikatulong taytayan nga mosumpay  sa isla sa Mactan ug sa dakbayan sa Sugbo.

Nakadayeg  si Radaza niini  human  niya  mabati nga gibanhaw  ni  Cebu City Mayor Michael  Rama   ang  maong   plano. Matud  pa  niya  nga ang  benepisyo nga   ikahatag  niining proyektoha  alang sa kadaghanan  angayan nga suportahan aron dili maghuot ang mga sakyanan sa duha ka mga taytayan   nga nagdugtong   sa dakbayan sa Mandaue ug  sa dakbayan sa Lapulapu.

Ang mga lugar nga posibling  tarokan  og   taytayan mao ang lungsod sa Cordova   ug  SRP sa dakbayan sa Sugbo   ug   sa lungsod sa Liloan   ug dakbayan sa Lapulapu.

Matud  pa  ni  Radaza  nga kung kini mahinayon  puwerting  kusoga  sa mga ekonomiya  sa  mga  dapit nga katarokan  ning  maong  taytayan. 

Samtang  ang  pagtaod  og tunnel  ilawom  sa dagat  alang  sa mga sakyanan  nga  molahos-lahos  tali  sa  mga dakbayan  sa Sugbo  ug  Lapulapu  ingon  og  sagkaon  kaayo  tungod  sa kadako  sa gasto  niini,  ug  kinahanglang  tun-an  pa  kini  og  maayo  sa  mga  eksperto, sumala  ni  Radaza.

Samtang  mapasalamaton siya  sa kontraktor   nga nag-ayo sa unang taytayan  kay   paspas ang ilang trabaho  ug gani  10% nalang  ang tiwasunong  trabaho   sa PLD   contractor   sa maong taytayan,  aron  kasugdan  usab  dayon  ang pag-ayo sa Marcelo Fernan Bridge   human  niini.

Giawhag  lang  ni  Radaza ang mga sumasakay nga  samtang  giayo  pa  ang  mga taytayan , mas maayo  nga sa ferry boat  kang  una   sila  mosakay aron dili   sila  malangay sa ilang   biyahe.  (BANAT NEWS)