Kapolisan palpak batok sugal nga masiao

CEBU, Philippines - Milampos ang kapolisan pagsumpo sa sugal nga video karera dinhi sa dakbayan apan wala sila makasumpo sa pagkuyanap sa “illegal numbers game” nga gitawag og masiao.

Ang Banat News makadawat matag adlaw og hilabihan ka daghang report gikan sa katawhan nga nagpahibalo nga nagpadayon gihapon ang masiao sa ilang palibot.

Ang kalihukan sa iladong masiao operator nga taga Barangay Pasil nagpadayon kay gani kanunay nga mangisyu og numero ang iyang usher diha kilid sa usa ka department store sa V. Gullas Street.

Ang kagamhanan mimugna pipila ka tuig na ang milabay og balaud nga nagpausbaw sa silot sa mga masakpang nalambigit sa mao nga illegal nga sugal, apan wala usab paspasi sa kapolisan ang pagpanakop.

Gani timailhan nga nagpadayon ang illegal numbers game mao ang walay hunong nga pagpangimprinta og mga tip sheets sa masiao sa mga imprintahanan diha sa dalan Sikatuna ug kanait nga lugar.

Ang dakbayan sa Sugbo nagmugna og City Ordinance 1616 nga nagdili sa pagpamuhat, pagbaligya og paghupot sa mga tip sheets sa masiao apan wala hingpit nga gipatuman sa mga polis.

Basi sa Republic Act 8551, ang tahas sa pagsumpo sa illegal nga sugal anaa gipatung sa abaga sa mga mayor ug ubang local chief executives kay gihatagan man sila og operational supervision ug kontrol sa kapolisan isip mga Napolcom deputies. (BANAT NEWS)