Mamarokay nasikop sa kapolisan

CEBU, Philippines - Nagtingkagol sa karsel ang usa ka giingong mamarokay human kini maaktohi  nga  naghupot og gituohang shabu ug   pusil   didto  sa sitio Lumboy, barangay Liburon, syudad sa Carcar,  sa miaging  gabii

 Ang nasikop nailhan nga si Yolando Cañas Quijano, 20, molupyo sa maong lugar ug gikatahong mamarokay sa maong dapit.

Sa nasayran, ang kapolisan sa dakbayan sa Carcar mipahigayon og  monitoring sa maong dapit  human  sila makadawat  og  taho  bahin  ni Quijano nga   kadudahang  naghupot   og gituohang shabu.

Sa ilang pagsusi, ilang   nasuta  nga naghupot  usab  kini og armas   gawas  sa  shabu ug drug paraphernalia.

Matud pa ni PO2 Rosendo Binondo sa Carcar Police   Station dihang nahinabi sa Banat News  usa lang ka giingong mamarokay sa maong dapit.

Gisalikway usab ni Binondo ang migawas nga report nga usa ka gun runner si Quijano.

Bisan paman niini,   padayong  gipanid-an  sa kapolisan  ug mohimo  pa kini  og lawom nga imbestigasyon   nganung adunay armas si Quijano.

Nakuha gikan sa mga kamot ni Quijano mao ang kalibre .38 nga adunay unom ka bala, unom ka gagmayng pakete sa gituohang shabu, napulo ka tin foil strips, usa ka puti nga plastic container ug usa ka lighter. Kasong kalapasan sa RA 8294 kon Illegal Possession of Firearm and Ammunitions; Sec. 11 ug 12 sa R.A. 9165 ug Comelec gun ban  maoy  ipasaka  batok  ni  Quijano. (WC)(BANAT NEWS)