Rama makigtagbo sa taga Bato

CEBU, Philippines - Pakigtagboan ni Mayor Michael Rama ang lider sa mga lumolupyo sa Sitio Bato, Barangay Ermita aron pangutan-on sila kun unsay gusto nila nga mahitabo sa ilang dapit.

Matud ni Rama nga gusto siya nga palamboon ang sitwasyon sa maong mga lumolupyo kang kansang kabalayan iyang gibisitahan pipila ka semana ang nakalabay.

Ang kabalayan sa mga tawo nga anaa magpuyo sa Sitio Bato nahimutang na sa dagat kay gani ang ilang mga haligi anaa na giugbok sa tubig-dagat.

Adunay uban nga mihulagway sa maong kabalayan sa Sitio Bato nga maoy naghatag og bati nga talan-awon alang niadtong mobisita kinsa  nagplano unta  nga mopalit og yuta sa SRP.

Nabantayan sa mga tigpaniid nga nag-anam na kadaghan ang kabalayan nga gitaruk   sa kilid sa viaduct nga kaniadto hawan pa kaayo gikan sa tampi sa dagat.

Ang Sitio Bato nakakuha sa mao nga ngalan tungod kay popular kaayo kini nga palitanan og shabu.

Ang termino nga bato maoy “codename” sa shabu.

Gusto unta ni Rama nga ang daplin nga bahin sa kadagatan dinhi sa dakbayan kabutangan og “Bay Walk” sama sa Barangay Suba paingon sa Pasil nga ang daplin sa dagat mahimo na nga malakwan.

Ang tigom ni Rama uban sa mga lider sa Sitio Bato wala pa matakda apan gusto sa mayor nga mapahigayon kini sa labing dali nga panahon. (WC)(BANAT NEWS)