Giluba angol sa wa ilhing kriminal

CEBU, Philippines - Naangol ang usa ka batan-ong lalaki  human  dunggaba  sa   wala   hiilhing kriminal   didto  sa dalan Punta Rizal, sa barangay Poblacion, dakbayan sa Lapu-lapu sa miaging  gabii.

Ang  biktima mao si Ryan Berdin Baguio, 21,  walay trabaho ug nagpuyo sa sitio Nangka sa barangay Gun-ob sa maong dakbayan.

Matud pa ni PO1  Jomar Florentino  sa homicide section sa kapolisan sa maong dakbayan nga nahinabi sa Banat News   nga naglakaw   sa karsada  ang  biktima pauli sa ilang   balay sa maong  higayon  dihang gikatagbo   niini  ang wala hiilhing lalaki  nga nagdala og  kutsilyo ug sa walay  igong  hinungdan  gideretso  og  dunggab  ang  biktima.

Nasabak sa tiyan    apan  nakadagan  pa kini  bisan  samdan  ug  nakapangayo  og   panabang  sa  mga  nagpuyo  sa maong  lugar.

Ang  nakadunggab  kaniya  dali  usab  kaayong  nakaikyas  human  makita  niini  ang  mga  molupyo  sa maong lugar  nga  miduol  ug  mitabang  sa samaron  nga biktima.

Gihatud  dayon  sa tambalanan  ang  biktima  samtang  ang  kapolisan  padayon  pa  sa pagpaniid aron  masikop  ang kriminal.

Gituohan  sa  kapolisan  nga  ang  kriminal  malagmit   adunay personal nga kasuko sa biktima nga maoy hinungdan sa maong pagpanunggab.  (BANAT NEWS)