Referee gipusil patay sa wa ilhing kriminal

CEBU, Philippines - Namatay  diha-diha  ang  usa  ka referee sa basketball human kini pusila   sa wala  hiilhing  kriminal  didto sa  sitio Puntod, sa barangay Alaska- Mambaling, dakbayan  sa Sugbo sa miaging  gabii.

Ang biktima giila nga si Rolando Cañete Pasumala  alyas Tambok, 54 , ug molupyo sa maong lugar,  ug   usa   ka professional  referee  sa basketball nga sweldado sa city hall.

Matud pa ni Florencio Magtagad, 44, higala  sa biktima, nga didto  sa sulod  sa iyang  tindahan  ang  biktima  mipadayag kini nga ang biktima  nag-ayo  sa iyang  water  dispenser  dihang  may  miabot  nga  motorsiklo  nga  gisakyan  sa duha  ka wala hiilhing  lalaki.

Mihunong  kini  makadiyot  ug  ang angkas kalit  nga  milanit  sa iyang  armas  dayong  pusil  ngadto  sa biktima.

Dugang pa ni Magtagad   nga dihang   napaluhod  ang  biktima  pagkaigo  niini  giusban  pa  gyud og  pusil hangtud  nga nahagba   kini sa sementadong dalan.

Nasabak  sa nagkalainlaing  bahin  sa lawas  nga maoy  hinungdan  sa hinanaling  kamatayon  niini.

Diha-diha  mibiya  usab  dayon  ang  mamumuno  sakay  sa ilang  motorsiklo   ug  wala  na  hiabti  sa kapolisan.

Ang kapolisan   padayon  pa  usab   nga nagasubay  sa  anggulo sa maong krimen.

Si PO3 Lou Pagara sa Cebu City Homicide Section mibutyag  nga sa ilang pakighinabi sa kapuyo sa biktima ilang nasayran nga walay kontra  ang  biktima  sa ilang dapit.

Hinungdan nga gisubay karon   sa kapolisan  ang  posibling  nakakita  kini og  kontra kabahin  sa iyang  pagka-referee  sa basketball. (BANAT NEWS)