P6.4 milyon nga utang sa siyudad mas maayong bayran

CEBU, Philippines - Kun si Kongresista Tomas Osmeña maoy pahukmon, gusto niya nga bayran na lang ang Young Builders Corporation sa unom ka milyon ka pesos nga gi-award sa Court of Appeals.

Ang kantidad nga gi-award sa Court of Appeals ngadto sa Young Builders Corporation tungod sa kuwang nga bayrunon sa dakbayan kabahin sa wala matiwas nga pagtukod og Carbon Market Unit 2. Kun mobayad ang dakbayan sa Sugbo sa gi-award nga P6.3 million ngadto sa Young Builders, mokabat na og dul-an sa P31 milyones ang nabayad sa siyudad sa wala matiwas pagtukod nga merkado. Si Osmeña miingon nga mas bentaha nga bayran na lang sa dakbayan ang Young Builders kay sa modako pa kini sahi sa nahitabo sa kaso sa Rallos.

Gihimong basihanan ni Osmeña nga ang pamilyang Rallos buot unta magpabayad sa ubos ra kaayo nga kantidad kaniadto apan gibabagan usab ni Mayor Michael Rama hangtud nga mitubo ug miabot na og dul-an sa P135 milyones.

Si Osmeña miingon nga kaniadto wala nila pabayri dayon ang gidemanda nga bayad sa Young Builders kay nangayo kini og dul-an sa P80 milyones ug walay klaro nga kwentada nganong miabot niini ang maong kantidad.

Usa sa rason nga wala idayon ni Osmeña ang construction sa Carbon market unit 2 kay gusto sa kanhi mayor nga ang building mahimong ka-parkingan og mga sakyanan ang ibabaw nga bahin aron  dili magdasok ang sakyanan sa merkado.

Si Mayor Michael Rama miingon nga patun-an pa niya sa mga abogado sa dakbayan ang hukom sa Court of Appeals.  (BANAT NEWS)