Magsuon napaig

CEBU, Philippines - Nangapaig na dihang nakit-an ang duha ka mga bata human na-trap sa nasunog nila nga balay sayo sa buntag kagahapon diha sa bukiron bahin sa sitio Batching, barangay Cabadiangan, lungsod sa Compostela.

Ang magsuon nga Jolito Dejesica, 14, usa ka disabled, ug ang manghod niini nga si Maricar Dejesica, 2, diha na nakit-an sa sala sa balay nga matud pa naggakos.

Gisuwayan unta sa pagpatay sa mga silingan ang kalayo apan pakyas sila sa pagsalbar sa duha ka mga bata.

Biniyaan nga nilung-ag ang gitumbok nga hinungdan sa sunog human gibiyaan sa inahan nga si Jocelyn, 38, ang giluto niini sa abuhan dili layo sa panimalay.

Matud ni SPO4 Wilfredo Caturza, chief investigator sa Compostela Police Station, nga mga agipo gikan sa gisugnod nga kahoy gipalid sa hangin ug didto napadulong sa balay sa biktima nga ginama sa light materials.

Si Jocelyn wala usab diha  kay matud pa nagkawos kini og tubig sa tabay mga 15 metros ang gilay-on. Ang amahan sa mga biktima nga si Carlito, 39, giingong atoa sa gitrabahuan nga poultry farm.

Matud ni Caturza nga nalangay sa pagpauli si Jocelyn ug uwahi na niining nabantayan ang nagdilaab na nilang panimalay.

Sumala pa sa kapolisan, nakadungog pa ang mga silingan sa paghilak sa mga bata nga nangayo og tabang apan tungod sa kadako na sa kalayo wala gyud nila sila masalbar.

Matud ni Caturza nga naglisod usab sa pagluwas si Jolito sa iyang manghud tungod kay naglisod kini sa paglakaw.

“Pungkol man gud ni og tiil murag polio bataa unya ang manghod basin naratol kay dos anyos pa sad,” matud niya.

“Pag-abot sa bombero, tungod kay bukid kaayo ang lugar ugdaw na ang balay unya ang hose dili kaabot,” matud pang Caturza.

Ang Municipal Social Welfare and Development Office (MSWDO) ug ang local government mihatag na og tabang alang sa pamilya sa biktima.  (BANAT NEWS)