DA makig-alayon sa PNB alang sa programa sa panguma

CEBU, Philippines - Ipatuman  pagbalik  sa Department  of Agriculture (DA)  ug  sa National  Agriculture and Fishery Council (NAFC)  uban  sa abag  sa Philippine  National  Bank (PNB)  alang  sa dali  nga  paghatud  og  pangalagad,  suporta  o  kaha  pagpanudlo  sa  mga  teknolohiya nga  may  labot  sa panguma sa kabarangayan.

Kini  pinaagi  sa dili  pa dugay  nga  pagpirma  ni  Kalihim Proceso Alcala  sa DA  sa usa ka  kasabotan  tali  sa NAFC ug PNB  sa pagpatuman  sa usa  ka special vehicle  loan  fund program (OSVLFP)  ang  usa  ka  pangutang  nga  ihinabang  sa  mga  technician  sa agrikultura   ug  uban  pang  extension worker  sa maong  departamento aron  makabaton  sila  og  sakyanan  alang  sa dinalian  nila  nga pagpanuaw  sa ilang  mga kliyente  nga nagpuyo  sa lagyo  nga  mga  lugar.

Sumala  ni  Kalihim  Alcala nga  ang  mga  sakyanan  sama  sa traysikol  dako  kaayo  og ikatabang  kanila aron  sayon  sila  nga  makabiyahe  sa  mga  lagyo  nga barangay  ug  hatagan  pa  sila  og  mga teknikal  nga hinabang aron mahimong  paspas  ang  pagtuman  nila  sa ilang  katungdanan.

Matud  pa  ni Alcala  nga  kining  maong  programa  ipatuman sa tanang  rehiyon  sa nasud  ug ang tagsatagsa  ka  hepe  sa maong  ahensya    maoy lig-ong  kaabag  sa  kagamhanan aron  molampus  ang  tanang  programa  nga may labot  sa panguma.

Dinhi  sa rehiyon  7 giandam  na  ang  mga  kalihukan  nga gitumong  sa  pagpalambo  sa  produksyon  sa kaumahan  ug  panagat pinaagi  sa pagpatuman  sa  mga  programa  nga  gilusad  ni  Kalihim  Alcala sa  ikalambo  sa mga mag-uuma  ug  sa produksyon  niini. (BANAT NEWS)