DTI nag-monitor sa namaligya og mini nga sticker sa helmet

CEBU, Philippines - Ang Department of Trade and Industry (DTI-7) mipahigpit   sa ilang pag-monitor  sa  mga  pabrika, importer, retailer  ug  mga  tindahan  nga  namaligya og mga  helmet sa motorsiklo.

Kini  aron  masiguro nga kadtong helmet lamang nga adunay markang Philippine Standard (PS) o Import Commodity Clearance (ICC) mark ang ibaligya sa mga tindahan. Kahinumdoman nga natapos niadtong Disyembre 29, 2012 ang pagpanginspeksyon ug pagpamutang og ICC sticker sa mga helmet sa mga nanag-iya og motorsiklo.

Apan subay sa monitoring ug enforcement nga gipahigayon sa DTI-Bureau of Product Standards (BPS) ug DTI-Negros Oriental Provincial Office, nasuta nga adunay mga department store sa syudad sa Dumaguete ang namaligya og mini nga ICC sticker sa helmet sa motorsiklo.

Sumala pa ni DTI-7 Regional Executive Director Asteria Caberte nga human sa dinugtong  nga  imbestigasyon, gipamulta  nila  ang  maong tindahan ug  ingon  man  ang  importer sa maong mga helmet. Dugang pa ni Caberte nga ang mga tinuod nga ICC sticker aduna kini daghang gipatapot  nga security features isip  proteksyon  niini aron dili  masundog  sa  mga malditong  negosyante. Gipahimangnuan ni Caberte ang mga distributor o mamaligyaay og helmet nga mokuha og suplay ngadto lamang sa mga importer nga gihatagan og PS license ug Import Commodity Clearance (ICC) certificate.

Giawhag usab ni Caberte ang tanang mga drayber og motorsiklo lakip na ang publiko sa pag-report gilayon ngadto sa buhatan sa DTI 7 kung aduna silay masuta nga mga tindahan nga namaligya og helmet nga walay ICC o PS mark. (BANAT NEWS)