Mga kawani sa CH nakadawat na’g bonus
CEBU, Philippines - Dagku kaayo’g pahiyom ang mga kawani nga regular ug kaswal sa Cebu City Hall kay nadawat na nila ang tag P12,000 nga Charter Day bonus kagahapon.
Ang pagpanghatag gipaagi sa tagsa-tagsa ka department heads aron nga mas paspas ang pag-release sanglit nakaila sila sa ilang mga sakop.
Bisan og lapas na sa alas 12 sa udto kagahapon ang mga kawani sa Office of the Mayor walay hunong sa paglinya didto sa opisina ni Belinda Navascues nga maoy secretary ni Mayor Michael Rama.
Si Rama sayo pa misugyot nga tag P7,000 ra ang Charter Day bonus nga ihatag sa matag kawani, apan ang mga konsehal sa dakbayan miawhag ni Rama nga himoon kini nga P10,000.
Inay tumanon ang sugyot sa mga konsehal, si Rama mihimo hinoon nga P12,000 sa matag usa ug ang maong kantidad giaprobahan sa City Council human ang city treasurer mitataw nga adunay kwarta ang dakbayan nga magamit.
Gipaabot nga dili na daku ang mahatag nga Christmas bonus sa mga kawani sa City Hall karong Disyembre kay kun dagku gihapon ang ihatag kanila molapas na sila sa gilatid nga kantidad sa Department of Budget and Management.
Mga kawani sa City Hall nangalipay tungod kay sa buwan sa Mayo makakobra na usab sila og mid-year bonus nga katumbas sa katunga sa usa ka buwan nila nga sweldo ingon man katunga sa P5,000 nila nga cash bonus. (BANAT NEWS)
- Latest
