Caramihan misabot sa kasagmuyo ni PB member Binghay

 CEBU, Philippines - Gipadayag  kagahapon  ni  konsehal  Dave Caramihan sa  lungsod  sa Balamban  nga nasabtan  niya  ang  pagkasagmuyo sa  iyang uyoan  nga  si  Provincial  Board Member  Alex Binghay  sa iyang  pagkandidato pagka-bise  mayor  sa maong  lungsod.

Si  Caramihan  kinsa  anaa sa katapusang  termino  isip  konsehal  sa lungsod  sa Balamban  mitawag  sa Banat  News  aron  pagpadayag  sa iyang  bahin  kalabot  sa maong  isyu ug  miingon  nga  dili  lamang  iyang  tiyo  ang nasagmuyo  kundi  hasta  siya  ug  ang  tibuok  nilang  pamilya  sa maong  lungsod.

Nahisgotan  niya  nga  kaguol  kini  sa katibuk-ang  pamilyang  Binghay tungod  kay  si Mayor Ace  Binghay  ug  Vice Mayor  Rosie  Binghay  iyang  ig-agaw igtagsa  ug  tiya  ang  usa ug  usa,  tungod  kay anak  kini  ug  asawa  ang  usa’g-usa  sa iyang  tiyo   nga  si  PB member  Binghay kinsa manghud  sa iyang  inahan. Apan matud  pa  ni  Caramihan  nga  wala  siya makigsungay  sa  iyang  tiya ug tiyo  niining  iyang  pagpakig-atbang  sa pagka-bise  mayor  tungod  kay  wala  siya  mosakay  og  unsa  mang  partido  kundi  magpapili  siya isip  independenteng  kandidato pagka-bise  mayor  sa umaabot  nga election.

Midugang  siya  nga  igo lamang  siyang  mituman  sa gisaad  kaniya sa  iyang  tiyo (PB member Binghay)  nga ang  tuig 2013 ihatag kaniyang  higayon  alang  sa paglansar  sa  pagka-bise  mayor  sa  lungsod.

Nahinumdoman  ni  Caramihan  nga  niadtong  tuig 2008 nagkasabot  sila  ug  sa iyang  tiyo  nga sa  tuig  2010,  ang  iyang  tiya  Rosie  maoy  palansaron  sa  pagka-bise  mayor,  ug  human  niini  ang tuig 2013 ihatag  na  usab  kaniya (Caramihan)  ang  higayon  sa  paglansar  sa maong  posisyon.

Apan  gibati  siya  og  kasagmuyo, matud  pa  ni Caramihan  kay  imbis  gisabotan  nila  nga  usa  lang  ka termino  ang  silbihan sa iyang  tiya  Rosie  inigkatapos  sa iyang  termino  gikan  niadtong  2010, apan  “nausab  ang  hangin  kay  giganahan  man  si tiya  ug  gustong  mopadayon  sa iyang  pagka-bise  mayor  sa election  sa 2013, busa nahiubos  ako”, matud  pa  niya.

Apan  tungod  kay  gitamdan  niya  ang gisaad  sa iyang  tiyo, si Caramihan miingon  nga  dihang  nasuta  usab  niya  nga  may  mga  dumadapig  siya  nga  mipasalig  usab  nga  mosuporta  sa  iyang  kandidatora, midesider  siya  sa paglansar  sa pagka-bise  mayor  sa Balamban.

Hinuon  iyang  gipasalig  nga  kining  tanan tungod  ug alang  lang  sa politika  ug  walay  labot  ang  ilang  relasyon  isip sakop  sa usa  ka pamilya, dugang  pa  ni  Caramihan.

Iyang  gipasabot  nga   mapildi  man siya  o  makadaog  magpabilin  ang  maayong  relasyon   sa  mga sakop  sa pamilyang  Binghay sa Balamban  kinsa  nasuwertihan  nga  gipiyalan  sa katawhan  sa maong  lungsod  sa pagdumala  sa panggoberno  ning lugara.  (BANAT NEWS)