‘Namoso’ gidunggab patay

CEBU, Philippines - Usa ka 44-anyos nga lalaki nga gipasanginlang nanglili sa banyo diin usa ka babaye ang naligo ang gidunggab patay sa kapuyo sa babaye  diha sa Sityo Purok Sambag sa barangay Sangi siyudad sa Toledo niadtong Domingo sa alas 7:00 sa gabii.

Ang biktima mao si Agustin Gako Canada, 44, nagpuyo sa maong lugar ug walay klarung trabaho.

Samtang ang suspek mao ra usab ang iyang silingan nga si Albert Abarquez Flores, kinsa kapuyo sa babayeng giingong gilili sa biktima nga niadtong tungora naligo sa pansayan.

Matud ni SPO4 Carmelito Hornales, desk officer sa Toledo City Police Station dihang nahinabi sa Banat News gipasanginlan ang biktima nga nanglili sa banyo apan gi-demalas kay nasakpan sa suspek.

Didto nagdali nga nibalik sa sulod sa balay ang suspek ug nikuha og kutsilyo ug gibalikan ang biktima ug walay daghang pangutana gidunggab kini sa dughan.

Ang suspek nisibat dayun human sa hitabo ug ang biktima gidali sa pagdala sa Toledo City District Hospital apan gideklarar nga dead on arrival.

Hangtud ning pagbalita padayon pa ang manhunt operation sa kapulisan sa nagtagotago nga suspek.  (/EIM) (BANAT NEWS)