Driver gilapsan sa bala kritikal

CEBU, Philippines - Talandugon  ang kahimtang  sa   usa  ka drayber  sa habal-habal  human  lapsi  sa bala  ang  dughan  niini  gikan  sa  bukobuko  nga  maoy  gi-target  sa wala hiilhing  kriminal nga miatang kaniya didto sa Sitio Minolos-2, barangay Matab-ang siyudad sa Toledo sa miaging gabii.

Ang biktima mao si Edwin Ygot, 32, minyo, nagpuyo  sa maong lugar ug drayber  sa habalhabal.

Si SPO4 Carmilito Hornales, desk officer sa Toledo City Police Station mibutyag  sa Banat News  nga samtang nagmaniho ang  biktima  sa  iyang motorsiklo  gikan sa Proper Luwas, Matab-ang ug paingon na untang mopauli, pag-abot   niya sa tabukonon nga sapa  giluthang  kini  sa wala hiilhing kriminal  ug  naigo  ang  iyang  buko-buko  ug  milapos  ang  bala  sa iyang  dughan. Tungod  sa kataas  sa iyang  resistensya nakapadagan  pa   kini  sa iyang  motor  ug nakaabot  sa ilang balay  sa talandugon  nga  kahimtang.

Gihatud  dayon  siya  sa iyang  pamilya  ngadto  sa Balamban District Hospital apan tungod sa delikadong kahimtang niini gibalhin  usab dayon  sa tambalanan  sa dakbayan sa Sugbo.

Samtang  padayon  pang  giimbistigar  sa  kapolisan  ang  maong  hitabo  ug  pag-ila sa  kriminal  ug  ang  motibo  sa  maong krimen. (BANAT NEWS)