Tindahan sa MCIA padayong gisirad-an

CEBU, Philippines - Human ibasura sa korte ang gipangayong Temporary Restraining Order (TRO) sa mga tag-iya og tindahan sud sa Mactan Cebu International Airport (MCIA) padayong gisirad-an  ang maong mga tindahan kagahapon.

Sa resolution ni Lapulapu City RTC Branch 53 Hon. Judge Anna Marie Melitante mihatag siya  og higayon sa tagdumala sa MCIAA sa pagtubag sa mga alegasyon sa mga petitioner  ug susihon usab niini ang legalidad sa bidding nga nahitabo sa milabay’ng Septembre 2012.

Gumikan niini sa umaabot nga Marso 15 ipadayon ang pagdungog sa kasong gipasaka sa mga mireklamo nga sila si Nora ug Ramon Lanojan ang tag-iya sa RJIN Pasalubong ug ubang mga tag-iya sa gagmay’ng tindahan sud sa tugpahanan batok ni MCIAA Gen. Manager Engr. Paul Villarete,  mga sakop sa Board of Directors sa MCIAA ug sa Special Bids and Awards Committee aron pamatud-an nga anomaloso ang gihimong bidding sa milabay’ng tuig.

Matud pa ni MCIAA Business Development and Concession Division Manager Nene Tamidles nga ipadayon nila ang ilang pagturn-over sa maong mga stall sa international ug domestic area ngadto sa Ceasar’s Foodland Inc. nga maoy midaug sa  subasta batok sa walo ka mga bidder sa milabay’ng September 2012. 

Gibarogan ni Tamidles nga nagsubay sa husto nga  proseso ang maong  subasta ug andam sila nga moatubang sa gipasakang kaso sa mga petitioners. (BANAT NEWS)