Rabies gibantayan sa taga Bohol

CEBU, Philippines - Sa tinguha nga makab-ot ang Rabies Free sa Pilipinas, ang mga lokal nga opisyales  sa probinsya sa Bohol, mga opisyales sa City Veterinary inubanan sa Department of Health-7 (DOH), Department of Agriculture Regional Field Unit 7 (DA RFU-7) ug usab pinaagi sa kooperasyon sa mga Local Government Units (LGUs)  nagtinabangay sa programa batok sa rabies.

Gitug-an kini ni Gobernador Edgar Chatto sa Bohol  sa pakighinabi  sa Banat News atol sa bag-ohay lang nga Awarding Ceremony 2012 Bohol Rabies Prevention and Eradication Program 3rd Governor's Award for Best Performing LGU Councils. Matud  pa  ni Chatto nga ang gasa sa maayong panglawas mao ang batakang katungod sa matag tawo ug mao  kini  ang  gibantayan  pag-ayo sa  mga  lokal  nga  opisyal  sa kagamhanan  sa matag  lungsod  ug  siyudad  sa Bohol.

Gipadayag sa gobernador sa kamahinungdanon  sa hingpit  nga  pagkawala  sa mga kaso sa rabies sa tibuok  lalawigan  aron mahimo kining rabies free, agi  og pagsanong  sa programa  sa kagamhanang  nasudnon. Atol sa maong kalihokan nga adunay tema nga "Local Governments' Pivotal Role in Rabies Elimination gipakita usab ang estatistika sa mga miaging kaso sa rabis nga gipangunahan ni Dr.Reymoses A. Cabagnot, Provincial Health Officer sa probinsya sa Bohol diin sa tuig 2006 natala nga ang maong probinsya maoy nag-una  sa mga  lalawigan  nga labing  daghan  og  kaso napaakan  sa iro  sa tibuok  rehiyon 7 apan sa tuig 2010 ang probinsya sa Bohol gideklarar nga Rabies Free.

Busa  gusto  ni  Chatto  nga  magpabilin  ang  kadungganan  sa tibuok  lalawigan  nga mawala  na  sa hingpit  ang  kaso  sa rabies. (BANAT NEWS)