Sunog sa Lahug ug Dalaguete 1 angol

CEBU, Philippines - Duha ka adlaw human gibuksan ang Fire Prevention Month,aduna gilayon  sunog nga mitumaw sa dakbayan sa Sugbo ug sa lungsod sa Dalaguete sa managlahi nga oras samtang usa usab niini ang napaso.

Ang unang  sunog nahitabo  sa Lahug, dakbayan  sa Sugbo  kagahapon  sa alas 4:00  pasado  sa kaadlawon diin naugdaw  ang  usa  ka car  shop  sa likod  nga bahin  sa barangay Hall sa maong   barangay   ug  ang  napaso  mao  si Tolentino Sentino, 32 , igsoon  sa tag-iya  sa maong  shop.

Nasuta ni Cebu City Fire Marshall William Tacaldo, nga  adunay kalit nga mi-spark sa taas nga bahin sa shop nga maoy posibling naingnan sa sunog.

Gibana-banang mokabat sa P250 mil ang danyos sa maong sunog diin may  gipaayong  mga  sakyanan  ang  nahilakip  usab  sa pagkasunog.

Samtang, nianang Biyernes pasado alas 7:00 sa gabii,  didto  sa sitio Dibdib barangay Sacsac ,lungsod sa Dalaguete ang laing sunog. Ang nabiktima  sa sunog  mao  ang  balay  ni Donesio Navarette, 66, diin lakip  nga gilamoy sa kayo  ang iyang tindahan ug mikabat  usab  sa P100 mil  ang  kadaot  sa maong  sunog.

Matud  pa  ni FO3 Jundy Deposa sa Dalaguete  Fire Station  nga ang kayo nagsugod sa kusina sa balay sa biktima.

Hinoon, walay naapil nga kasikbit nga balay niini nga  nasunog.  (BANAT NEWS)