Negosyante’g karne gipusil angol

CEBU, Philippines - Kritikal ang kahimtang sa usa ka negosyante og karne human kini pusila sa duha ka wala hiilhing kriminal didto sa barangay Pamiao, lungsod sa Compostela sa miaging  gabii. Ang biktima mao si William Mahinay Pareja, 50 , minyo, molupyo sa maong lugar ug usa ka negosyante og karning baboy sa maong lugar                 Si   PO2 Arnie Goc-ong, imbestigador sa Compostela Police Station mibutyag sa Banat News nga ang biktima gikang  nangompra og baboy nga ihawonon sa barangay  Cogon  sa maong  lungsod.

Apan samtang  nagpadagan  siya  sa iyang  motorsiklo pauli sa ilang  balay  namatikdan  niya  nga  may laing motor  nga  nagsunod  kaniya busa  mipabulhot  siya og  padagan.

Apan pag-abot niya sa eskina dayong liko  sa ilang balay   gipusil  siya  lima ka higayon ug nasabak  ang iyang  sampot  ug bitiis  apan  nagpadayon  pa  siya  sa pagpadagan  sa iyang  motor  hangtud  nga nakaabot  siya  sa ilang  balay  ug  wala  na  mosunod  kaniya ang  mga  kriminal dihang  duol  na  siya  sa ilang balay.

Gihatud  dayon  siya  sa iyang  pamilya  sa tambalanan  sa dakbayan  sa Sugbo  samtang padayon  pang  gipanid-an  sa kapolisan  ang  mga tawong  mipusil  kaniya  uban  sa pagtuo  nga bahin  sa negosyo  ang motibo  sa maong  pagpamusil. (BANAT NEWS)