Tigpatanto gipatay

CEBU, Philippines - Patay ang usa ka tigpatanto og kwarta ug negosyante human kini gipusil pasado alas 9 sa miaging gabii diha sa barangay Bonbon sa lungsod sa Aloguinsan.

Ang biktima nailhan nga si Victor Tausa, 36, kanhi Overseas Filipino Worker (OFW) kinsa nakaangkon kini og samad pinusilan sa iyang tiyan.

Sa inisyal nga imbestigasyon sa kapolisan, gikatahong anaa sa sulod sa ilang panimalay ang biktima ug nagtan-aw og telebisyon dihang gisangpit sa mga wala pa mailhing mga killers ang biktima gikan sa gawas.

Apan sa pag-abli ni Tausa sa pultahan gisugat kini og mga bala.

Si Tausa nga nakaangkon og samad pinusilan sa iyang tiyan daling gidala sa Pinamungahan District Hospital ug gidali unta kini pagbalhin sa South General Hospital apan gideklarar kini nga dead on arrival.

Matud pa ni PO2 Solomon Cardosa sa Aloguinsan Police nga walay bisan usa sa mga silingan sa biktima ang nakakita sa mga mamumuno. Nasayran usab sa kapolisan sa Aloguinsan nga ilado diay sa ilang dapit ang biktima tungod sa pagpautang niini og kwarta.

Ang hepe sa kapolisan sa lungsod sa Aloguinsan, Insp. Jorge Macapobre mipadayag nga blangko pa sila karun kung unsay motibo sa maong pagpamusil tungod kay walay kontra ang biktima sa ilang dapit. Matud pa ni Macapobre nagpanuko usab ang pamilya sa biktima paghatag kanila og impormasyon.

Ang biktima nasayran nga gawas sa iyang pagpatanto og kwarta namaligya usab kini siya og sigarilyo sa ilang dapit.

Nakuha sa kapolisan ang duha ka kabhang sa kalibre .45 human ang biktima gipusil sa makaduha ka higayon. (/EIM) (BANAT NEWS)