91-anyos nga lola napalgang patay

CEBU, Philippines - Usa ka 91-anyos nga babaye ang napalgang wala nay sapot ug patay na sa usa ka sapa diha sa bukirong barangay sa barangay Bulak sa lungsod sa Dalaguete.

Ang biktima giilang si Feliza Tangpus, apohan sa barangay kapitan sa maong dapit nga si Catalino Tangpus.

Matud ni Insp. Dexter Basiergo, hepe sa Dalaguete Police dihang nahinabi sa Banat News, usa ka Carmelito Abrigana ang nakadiskobri sa patay’ng lawas sa biktima. Sumala pa nga padung na og kadugta ang patay’ng lawas.

Sumala pa ni Basiergo,ilaha karong gisusi kung may foul play sa kamatayon niini. Dunay pagdudang posibleng giamong-amongan kini tungod kay nahubo na ang sapot niini, o ba kaha gitulis dayon gipatay.

Wala usab isalikway nga posibleng naligo kini sa maong sapa apan nadakin-as ug namatay. Niadto pang Biyernes sa gabii wala na igkita ang biktima. Si Kapitan Tangpus nga mibisita sa buhatan sa kapulisan kagahapon hugot gyud nga nagtuo nga dunay foul play ang kamatayon sa apohan.

Matud pa niini, kanunay kining magdala og kwarta.  (BANAT NEWS)