Duha ka bata apil sa pagpatay
CEBU, Philippines - Tulo ka suspek apil na niini duha ka menor de edad ang gisikop sa kapulisan human maoy gitumbok nga responsable sa pagdunggab patay sa usa ka Dutch national adtong Sabado sa buntag sa Barangay Cogon West, Carmen.
Ang mga suspek naaresto sa managlahing lugar sa gipahigayong hot pursuit operation sa kapulisan adtong Martes sa udto.
Si Raymark Quiseo, 19, nasikop sa pinuy-anan niini sa Barangay Baring mga alas 3:00 sa hapon. Ang pagkasikop ni Quiseo maoy hinungdan sa pagkasikop sa duha niini ka kaubanan nga nagpangidaron pa og 16 ug 17-anyos sa ilang mga pinuy-anan sa Barangay Cogon West.
Ang mga menor de edad gidala kini sa Municipal Social Welfare and Development office ug si Quiseo anaa na sa karsel sa kapulisan samtang gihikay na sa kapulisan ang tukmang kaso alang kanila.
Matud sa kapulisan nga ang mga suspek miangkon sa krimen. Matud ni PO2 Jerome Quimque, sa Carmen Police Station, nga ang mga suspek maoy gitumbok sa pagpatay kang Pieter Tuitel, 74, taga McKenly St., Barangay Cogon West.
Giingong giguba sa mga suspek ang sliding glass window sa balay sa biktima dayong sulod sa kwarto sa taas apan nakamata si Tuitel ug misusi sa ubos ug nakit-an ang mga suspek.
“Murag nakasukol ang biktima unya maong nadunggaban,†matud ni Quimque. Tungod sa kahadlok mikaratil sa pagdagan ang mga suspek nga walay nadala bisan usa. Si Quimque midugang nga aduna nay daghang pasangil sa pagpangawat batok sa 16- anyos nga suspek apan walay kaso nga napasaka batok niini.
“Reports lang wala gyud ma-file kay matud nila wala ra gihapon na kay menor kuno,†si Quimque nagkanayon. (BANAT NEWS)
- Latest
