Accountant mipamatuod CA ni VM Garcia na-liquidate na

CEBU, Philippines - Ang buhatan  sa municipal  accountant  sa lungsod  sa Barili miluwat  og  certification  paper  nga nagpamatuod  nga  hingpit  na  nga  na-liquidate  ni  Vice  Mayor  Marlon Garcia  ang iyang  mga  cash advances  gikan  sa panudlanan  sa lungsod.

Si Rosalina  Manigos, ang  municipal accountant  sa Barili mipahat  kagahapon  sa Banat News sa kopya   sa  maong sertipikasyon  sa  liquidation   o  nakuwentada  na  uban  sa  mga   gisuportang  mga  papeles  nga  mga  kuwartang  nagamit  ni  VM  Garcia  nga gipetsahan  og  Enero 30, 2013

Dinhi  sa certification  paper gitagsatagsa  sa  pagladlad  ni  Manigos  ang  listahan  sa  cash  advance  ni  VM  Garcia  nga  nahusay na uban  sa  mga  supporting  document  ug  sa  mga  giuli  nga sobra  niini, tanan  niadtong Disyembre 28, 2012  ngadto  sa panudlanan  sa lungsod.

Kini  mao ang   P16,120  nga  cash advance  niadtong Nobiyembre 22, 2010,  giuli  niya  sa panudlanan  sa lungsod  ang mao  gihapong  kantidad,  niadtong Disyembre 28, 2012.

Sa  cash advance  niya  nga  P15,525 niadtong Oktobre 5, 2011,  P11,693  ang  iyang  nagasto  niini  , ug P3,832  ang  iyang  giuli ; P10,400 nga cash advance niadtong  Nobyembre 9, 2011, P8,574 ang  iyang  nagasto    ug P1,825 ang  iyang  giuli. Sa P25,250 nga cash advance niadtong Hunyo 18, 2012, P21,825.36  ang  iyang  nagasto  ug  P3,424.64  ang  nauli  niini; sa P18,565  nga cash advance niadtong Hulyo 9, 2012, P18,237.36 ang nagasto ug P327.64  ang nauli;

Sa maong sertipikasyon  nagpakita  nga  ang  tanang  kantidad  nga  nadawat  ni  VM Garcia  mikabat  sa P85,860;  ug P60,329.72  ang nagasto  niini  samtang  P25,530.28  ang tanang  nauli  ngadto  sa panudlanan sa lungsod.

Sa miaging  adlaw gibati  og  kasuko  si VM Garcia  dihang  nabati  niini  ang  mga  komentaryo  sa radio  nga  mipasangil  nga wala  pa  kuno  ma-liquidate  niya  ang  katibuk-ang kantidad  sa iyang  cash advance.

“Ingna  na  sila  nga  isagpa  nako  sa ilang nawong  kining  papeles  nga nagpamatuod  nga  nahusay  na  ang  akong  mga cash advances”,  sa  kalagot  sa bise mayor  batok sa nagpakatap  sa maong  isyu.

“Mahimong  mosang-at  ko  og  kasong  libelo  batok  sa  nagmugna  niining  bakak  nga  pasangil”  ,  dugang  pamahayag  ni  VM  Garcia.

Aron  mamatud-an  nga  wala  nay  tulubagon  ang bise  mayor  sa Barili, gipadangat  gyud  sa buhatan  sa municipal  accountant  sa maong  lungsod   ang  certification  paper  sa Banat News  kalabot  ning maong  isyu  nga gipetsahan  og  Enero, 30, 2013  nga permado  ni  municipal  accountant  Manigos. (BANAT NEWS)