Kapolisan sa Kapitolyo gi-pullout na

CEBU, Philippines - Human sa kapin sa duha ka buwan, gi-pull out na ang kapolisan nga nagbantay sa palibot sa Kapitolyo nga gibutang sukad nitumaw ang tensiyon sa pagsuspenso ni Gob. Gwendolyn Garcia niadtong Disyembre 19. Ang kasamtangang gobernador, Agnes Magpale, ang nimando kang P/Supt. Leopoldo Cabanag, kumander sa Regional Public Safety Batallion 7, sa pagpapauli na sa iyang mga sakop.

Gipahigayun kagahapon sa buntag ang formal turnover gikan sa kapolisan ngadto na sa mga sakop sa Civil Security Unit nga mao na ang mobantay sa Kapitolyo.

“Nakita na seguro nga na-normalized na gyud ang sitwasyon, wala na gyud seguro’y threat mao nang naka-decide siya nga ang CSU na maoy mo-secure diri sa Capitol area,” matud pang Cabanag. Gipasalamatan ni Magpale si Cabanag ug iyang mga sakop sa nahimo niini sa pagpatuman sa kahapsay ug kalinaw nga walay kadaut namugna sukad nahitabo ang kasamok sa politika sa niaging kapin duha ka buwan.

Masaligon si Magpale nga makaya na sa CSU ug mga blue guards ang pagpadayon sa pagbantay sa Kapitolyo human nilurang na ang tensiyon.

Gimandoan ni Magpale si Valentino Cruz, hepe sa CSU sa pagtuman sa responsilidad gikan sa Kapitolyo.

Nakadawat og pagsaway gikan sa kampo ni Garcia ang presensiya sa kapolisan nga giingong naghikaw sa mga tigpaluyo nga makabisita sa gobernador. Si Garcia nagmagahi sa pagbiya sa iyang buhatan sugod niadtong Disyembre 19, 2012 sa dihang gipasuspenso siya sa Malakanyang sulod sa unom ka buwan.

Nigawas lang si Garcia sa dihang nisayaw siya sa Sinulog niadtong Enero 20 sa gabii ug nibalik ra usab sa iyang buhatan.

Ikaduhang higayun nga nigawas si Garcia niadtong Enero 29 sa gabii ug nibisita sa lungsod sa Oslob sayo sa buntag niadtong Enero 30 aron pagtambong og kalihukan.

Apan wala na nakabalik si Garcia sa dihang gimandoan ni Magpale nga ipasirado ang Office of the Governor ug wala na pasudli lakip na sa mga kawani. (BANAT NEWS)