Misud nga way pananghid gisanggot patay

CEBU, Philippines - Diriyot maputol ang tangkugo ug nagkawil na lang ang nawong ug bukton sa usa ka wala mailhing lalaki human gisanggot sa usa ka mag-uuma pasado alas-8 sa miaging gabii diha sa sitio Puso-an barangay Buhisan.

Ang maong biktima gihulagway nga dakoon ang panglawas ug nagsul-ob og itom nga t-shirts ug blue shorts ug nagtiniil. Samtang ang suspetsado usab nailhan nga si Fortunato Saladaga. Matud pa sa anak sa suspetsado nga si Josephine, ang maong lalaki kalit lang nga misulod sa ilang  balay og miinom og tubig.

Dugang pa ni Josephine nga ang maong lalaki mitug-an nga dunay mga tawo naggukod kaniya apan nahadlok sila dihang nagmagahi kini sa paggawas.

Apan, inay nga mogawas  kalit lang niini nga giibot ang sanggot nga gisuksok sa kilid sa bungbong sa panimalay. Tungod niini gilayog sa iyang amahan ang maong lalaki ug nag-ilogay sila sa maong sanggot. Usa ka Dave Jeppesen maoy nakakita sa biktima sa wala pa ang insidente nga nagdagan kini ug naglugsong gikan sa pikas nga bahin sa buntod apan iyang nasuta nga susama sa samdan na daan ang tiil sa biktima.

Lain usab nga residente nga si Ruth Pueblas, mipadayag usab nga ang biktima kalit usab nga misulod sa ilang panimalay ug milingkod apan mibiya ra usab kini dayun nga walay pananghid. Samtang ang suspetsado usab sa iyang bahin, mipadayag nga sa diha nga iya na unta nga pagawson ang biktima nagmagahi kini gani, iya gyud kini nga gitarong og hangyo.

“Ako siya nga giingnan nga, ari lang ta gawas maglingkod bay, unya gahi naman gyud siya unya kita siya sa sanggot gidiretso man og kuha ako pud nga giilog unta,” pasabot pa ni Saladaga.

Gipadayag usab sa suspetsado nga wala siya magmahay sa iyang gihimo tungod kay midepensa lang siya sa iyang kaugalingon ug sa iyang pamilya.

“Nganong magmahay man ko depensa man to sa akong kaugalingon ug ako’y mamatay mag-unsa naman lang akong pamilya makakita pa kayha sila nako?” saysay pa ni Saladaga. Matud pa ni SPO1 Victor Ruel Ayuman sa Homicide Section sa diha nga nahinabi sa Banat News nga hangtod ning pagsuwat ning balita wala pa gyuy bisan usa nga nakaila sa biktima. (BANAT NEWS)