Makinarya sa basura ibalhin ni Magpale?

CEBU, Philippines - Gitug-an ni One Cebu Gubernatorial Candidate 3rd District Cong. Pablo John PJ Giarcia nga ang iyang buhatan nakadawat og kasayuran nga si Acting Gov. Agnes Magpale naglaraw sa pagbalhin sa Waste to Energy Facility gikan  sa dakbayan  sa Naga  ngadto  sa siyudad  sa Danao.

Matud  pa  adto  kini  itarok   sa dakong luna nga kasikbit  sa yuta nga gipanag-iya ni Danao City Vice Mayor Ramon "Nito" Durano.

Si Garcia nagkanayon nga nasagmuyo siya sa gihimo ni Magpale tungod kay taastaas nga higayon ang gigugol sa iyang igsoong gobernador alang sa pagbutang sa maong pasilidad  sa siyudad sa Naga sanglit mao  kini ang labing haum nga lugar alang sa maong pasilidad.

Apan tungod kay si Magpale na ang nangatungdanan, ang maong proyekto  ibalhin sa lugar diin si Magpale nagpuyo.

Matud pa ni Garcia nga  kun  kini mahinayon dako kaayong kawad-on sa  mga  molupyo sa Naga. 

Kini tungod  kay makahatag  kini  og  dugang  usbaw  sa kinitaan  sa Naga ug dugang  kahigayonan  sa panarbaho  sa  mga molupyo  sa maong  lugar.

Nasayran nga  sa kantidad  nga $150 milyones  sa maong waste  treatment  facility,  gibanabana  nga  mokita usab   ang  kagamhanan sa   Naga  og P850 milyones  sulod  sa 25  ka       tuig.

Samtang sa bahin  ni 4th district Representative Benhur Salimbangon kini miingon  nga ang  pagbalhin sa maong proyekto gikan sa dakbayan sa Naga ngadto na sa syudad sa Danao  usa  ka  tataw  kaayong  pamolitika.

Gumikan niini, sila si provincial board member Sun Shimura ug Joven Mondigo Jr. misaad  nga ilang kwestyonon ang lakang ni Magpale didto sa hawanan sa session hall sa hunta probinsiyal sa higayon nga ipamugos niini ang  iyang laraw  nga walay  konsultasyon  sa hunta  probinsyal

Hinuon  si  Magpale  wala  makontak  ning  tigbalita alang  unta sa iyang ikapasabot bahin  ning maong  isyu. (BANAT NEWS)