Rama miawhag tarong nga kandidato maoy ipapili

CEBU, Philippines - Giawhag ni Mayor Michael Rama ang katawhan nga kinahanglang pilion gayud ang mga tarung nga kandidato sa umaabot nga eleksyon aron dili na masinati ang subli nga kalisdanan sa nasud.

Ang gipasabot ni Rama mao ang kasinatian nga natagamtaman sa katawhan dihang si kanhi Presidente Ferdinand Marcos mideklarar og balaud-militar kon martial law kaniadtong 1972.

Si Rama nagkanayon nga dunay mga sakop sa banay’ng Rama nga giapil sa pagsikop ug gitanggong sa taud-taud nga panahon dihang gideklarar ang martial law ni Marcos kaniadto.

Sa iyang mensahe atubangan sa mga kawani sa City Hall kagahapon sa buntag, si Rama miingon nga maayo lang kadtong mga tawo nga milayas na sa wala pa madeklarar ang martial law kay nakalikay sa pagkapriso.

 Bisan wala niya ilha apan klaro kaayo nga si Kongresista Tomas Osmeña nga iyang kaatbang pagka mayor sa umaabot nga eleksyon maoy iyang gipasabot.

Si Osmeña miangkon nga didto siya sa Estados Unidos dihang gideklarar ang martial law tungod kay miuban siya sa iyang amahan nga nagpatambal.

Apil sa mga gipangdakop atol sa martial law mao sila si Serge Osmeña, ang bana ni Minnie Osmeña, Lito Osmeña ug mga alalay ni Serging Osmeña nga amahan ni Tommy.

Si Rama miingon nga ang iyang uyoan nga si Napoleon Rama giapil usab sa pagdakop sa mga military.

Human sa pakigpulong ni Rama didto sa City Hall atul sa pagsaulog sa EDSA People Power Revolution, gibuhian ang upat ka langgam pati nga nagkahulogan og kagawasan nga matud pa sa mayor angay nato nga panalipdan kanunay. (BANAT NEWS)