Bukton ug paa gilapsan sa bala

CEBU, Philippines - Talandugon ang kahimtang sa 22 anyos nga ulitawo human kini pusila sa  wala hiilhing  kriminal  samtang  nagtan-aw     og  salida sa telebisyon sa iyang silingan didto sa barangay Bulyogan, lungsod sa Dumanjug   sa miaging  Domingo sa alas 7:00 sa gabii.

Ang biktima mao si Cris Randel Dendanillo, 22, ulitawo ug molupyo sa nahisgutang lugar

Si SPO1 John Eric Cordoves sa Dumanjug Police   Station  mibutyag sa Banat News  nga ang  biktima  naglingkod  sa kayda  sa balay  ni  Natty Gutang   nga iyang silingan   nga nalingaw  sa salida  sa TV  dihang kalit lang   gipusil  sa wala  hiilhing  mamumuno.

Gumikan  sa pagbuhagay  sa dugo   sa biktima  gikan  sa samad sa  iyang  walang  bukton  kansang  bala  milapos  sa iyang  paa,   nagkaguliyang  ang  mga  kauban  niyang  nanan-aw  sa salida  sa TV  sa maong  higayon. Ang inahan sa biktima daling nakapangayo og tabang ni barangay kagawad Rady Bilogolo ug gihatud dayon kini sa tambalanan.

Ang kapolisan padayon pa sa ilang imbistigasyon sa maong panghitabo pag-ila sa hinungdan  ug sa kriminal.

Gituohan sa kapolisan nga nanukad sa ibabaw nga  bahin ang namusil sanglit ang bala gikan sa  bukton  mipatighug  man  ngadto  sa paa.  (BANAT NEWS)