DSWD moila sa apektado sa bagyo

CEBU, Philippines - Ang Department of Social Welfare and Development Field Unit 7 (DSWD-7) pinaagi sa National Household Targeting System for Poverty Reduction (NHTS-PR) nangandam alang sa pagpahigayon og espesyal nga balidasyon karong umaabot nga Marso ning tuiga alang sa mga naapektohan sa miaging bagyo nga “Pablo”. 

Matud pa ni Kerwin Macopia, Administrative Officer V ug tigpamaba sa programang NHTS-PR sa DSWD-7 nga sa mga nasud nga kanunay nga makasinati og  kalamidad sama sa bagyo, ang DSWD nagpabiling abtik sa paghatag og espesyal nga programa isip proteksyon  sa mga  kabus nga pamilya pinaagi sa balidasyon.

Si DSWD-7 Regional Director Mercedita Jabagat mipahibawo nga ang DSWD-7 sa pagkakaron nanawat  og  93  ka  mga trabahante aron mosuroy  ug mosil-ing  sa  mga kabalayan ug  mohimo og ebalwasyon niini pagsuta  kun  nahilinya  ba  sila  sa  mga  kabus  nga pamilya sa Central Visayas.

Ang maong  mga  trabahante    maglangkob sa duha ka Area Coordinator, 13 ka Area Supervisor ug 78 ka Enumerator.

Ang NHTS-PR usa ka sistema  nga  modeterminar asang  mga  lugar  diin  makita  ang  labing  kabus  nga  mga  kabalayan  sa rehiyon.

Dugang pa ni Jabagat nga human ikatunol sa mga Local Government Unit (LGUs) ang lista sa mga apektado nga mga balay  sa bagyo, ang ilang buhatan magsugod dayon sa  house to house nga  ebalwasyon alang  sa  pagtino  sa katibuk-ang  gidaghanon  sa  mga kabus  dinhi  sa rehiyon 7  nga apektado  sa  kalamidad. (WC) (BANAT NEWS)