500 ka iro misalmot sa Bark for Love Walk

CEBU, Philippines - Malampusong gipahigayon kagahapon ang Bark For Love Dog Walk Activity nga gisalmotan  sa 500  ka  mga  iro sa pagpanguna  sa Lapu-Lapu City Veterinary Office didto sa Lapu-Lapu Shrine, sa  barangay Mactan, syudad sa Lapu-Lapu.

Mga nagkadaiyang serbisyo ang gipasiugda sa Lapu-Lapu City Veterenarians inubanan sa mga veterinarian  sa syudad sa Sugbo ug usab sa Department of Agriculture Region - 7 alang sa mga iro sama sa libreng pagbakuna sa iro, deworming, pet grooming, pet blessing ug uban pa. Matud pa ni Lapu-Lapu City Mayor Paz Radaza sa pagpakighinabi sa Banat News kagahapon nagkanayon  nga ang maong aktibidad maoy ikaduhang higayon nga gipahigayon didto sa syudad sa Lapu-Lapu.

Matud  niya nga  tumong niini aron nga mahatagan og higayon ang mga iro nga maka-socialize sama sa tawo og nga aron usab mapahimangnuan ang mga  nanag-iya sa maong mga iro nga kinahanglang atimanon gayud pag-ayo nila ang ilang binuhing iro, dili  panamas-tamasan ug nga kinahanglang sangkapan usab sila sa hustong pagkaon ug medikal nga serbisyo aron mabati sa maong hayop ang ilang pagkahalangdon sa kalibotan.

Dugang pa sa mayor nga responsibilidad sa mga nanag-iya og iro nga hatagan og pakabana ang ilang hayop ug nga dili unta kini nila itugot nga maglibod -suroy  sa kadalanan hangtud nga makapaak na hinoon og  mga tawo.

Sa bahin usab ni Dr. Janice Tugunon sa Lapu-Lapu City Veterinary Office siya miingon nga ilang gilusad ang maong aktibidad tungod kay gawas nga maedukar ang mga nanag-iya og iro kalabot sa hustong pag-atiman niini, ila usab nga gi-target nga mamahimong Rabies Free ang nasud sa tuig 2015.

Gipadayag ni Tugunon nga aduna na sila’y gipahigayon nga massive information campaign alang niini aron mapadayon sa mga tawo ang ilang kaamgohan mahitungod sa pagka responsableng mamuhiay og iro.

Gibutyag ni Tugunon nga aduna pay daghang wala  makahibalo kung unsay mahimong isilot sa mga magpasipala sa ilang gibuhing iro sama  pananglit sa kun makapaak kini unya may rabies , pabayron  sila og  multa   nga P 25,000, subay sa Republic Act 9482 o Anti Rabies Act of 2007.  (BANAT NEWS)