Lalaki gipatay sa agalon

CEBU, Philippines - Maayong pagkabuslot sa ulo sa usa ka lalaki human kini gikatahong giunay og patay sa iyang amo pasado alas-10 sa buntag kagahapon diha sa Sitio Upper Manol sa barangay Tisa dakbayan sa Sugbo. Ang biktima nailhan nga si John Carlos Bardinas, 23, molupyo sa sitio Mangga sa mao gihapon nga barangay samtang ang gitumbok nga suspetsado mao si Arnel Parba, 29, molupyo samaong lugar.

Sa pakighinabi sa Banat News ni PO1 Merlo Laborte sa Homicide Section mibutyag kini nga base sa gisaysay sa kapuyo sa biktima nga si Teresa Danlag, Sabado sa tungang gabii dihang nananghid kining moadto sa balay sa iyang agalon nga si Parba.

Matud pa ni Laborte nga posibleng aduna nay karaang gi-kabikilan ang duha.         

Butyag usab ni Laborte nga padayun pa sila karun nga nanguha og impormasyon tungod kay wala may bisan usa nga mipatim-aw aron mohatag og dugang impormasyon kabahin sa nahitabo.

Matud pa ni Laborte wala na diha ang suspek apan nakuha nila sa panimalay niini ang upat ka nilikit nga marijuana, mga drug paraphernalia ug mga plastic nga sudlanan sa illegal nga drugas.

Dugang pa ni Laborte nga base sa ilang nakuhang impormasyon, “bata-bata” sa suspetsado ang biktima.

Nagduda karon ang kapolisan nga posibleng may kalambigitan sa illegal drugs ang motibo sa maong krimen.

Ang biktima nga nakaangkon og samad pinusilan sa iyang ulo wala na mahatod pa sa tambalanan.  (BANAT NEWS)