Kampanya nga “Bawal ang Epal”gilusad

CEBU, Philippines - Ang Department of Social Welfare and Development 7 (DSWD-7) pormal nga milusad  kagahapon sa buntag sa "Bawal ang Epal”, usa  ka  matang sa kampanya batok  sa  mga  politiko  nga  magpapapel  sa mga benepisyaryo sa Pantawid Pamilyang Pilipino Program (4Ps) didto sa syudad sa Carcar.

Matud pa ni DSWD Secretary Dinky Soliman sa  iyang  pagpamulong  mipasabot  nga tumong niining maong programa mao  ang mga benepisyaryo  sa 4Ps nga maprotektahan batok sa mga salawayong kandidato sa umaabot nga eleksyon kinsa mogamit sa programang 4Ps aron hulgaon  ang  mga  hingtungdan  nga  kun dila mobotar  kanila ila  kining tangtangon sa   listahan  sa 4Ps.

Giklaro ni Soliman atubangan sa mga 5,000  ka  mga benepisyaryo sa 4Ps sa dakbayan  sa Carcar nga mitambong sa maong kalihokan,  nga walay kandidato nga makahimo sa pagtangtang kanila, tungod kay bugtong ang DSWD lamang ang makahimo sa ingon kun pananglit dili na makatuman ang usa ka benepisyaryo sa iyang  obligasyon  base  sa gisitar  kaniya  sa DSWD.

"Kun may kandidato nga mohulga  pagtangtang  kaninyo , bakakon  siya  ug  angay ninyong  hunahunaon  kun  angay  ba  siyang  mahimong  lider  sa nasud” matud pa ni Soliman.

Sa bahin usab ni DILG Undersecretary Bimbo Fernandez gihatagan  niini  og  gibug-aton  ang kamahinungdanon  sa  "Bawal ang Epal" nga kampanya alang sa mga benepisyaryo sa 4Ps.

Matud  pa  niya  nga dili  angay  nga  pahimuslan  na lang  sa  mga  kandidato  nga  kumo kay  mga  pamilyang  kabus  ang  mga  membro  sa 4Ps dali ra kaayo  nilang  hulgaon.

Maoy  hinungdan nga sukad  madawat  sa DSWD  ang  mga  taho nga matud  pa  may  mga kandidato  nga  nanghulga  sa  mga  benepisyaryo  sa 4Ps,  milihok  dayon  ang  mga  kadagkoan  ning  maong  ahensya   aron  proteksyonan  ang  mga  hingtungdang  benepisyaryo.

Gani ang tarpaulin  nga gisuwatan sa dagko  kaayong  letra  nga Bawal ang Epal gibuksan ug gibitay  didto  sa stage  sulod  sa sports complex  sa Carcar  pinaagi  sa pagpanguna ni  kalihim  Soliman , DILG Undersecretary Bimbo Fernandez ug DSWD-7 Regional  Director Mercedita Jabagat. Didto  usab  ipahibawo  ni  Soliman  nga bali  og  upat  ka buwan  ang   cash  grant  nga  madawat  sa  matag usa sa  5 mil  ka  benepisyaryo  niini  sa  Carcar sa  maximum nga P1,400.

Matud  pa  ni Soliman  nga  ang  madawat  sa mga  benepisyaryo  mao  ang  cash grant  nila  sa buwan  sa Nobiyembre, Disyembre, Enero ug Pebrero. Samtang  ang  sa buwan  sa Marso, Abril ug Mayo  unya  na  nila  madawat  sa buwan  sa Hunyo, sa liwas  sa  piniliay.

Busa  gimando  ni Soliman  sa  mga  hingtungdang  benepisyaryo nga  adunay mohulga  kanilang  kandidato  kinahanglang  ipahibawo  dayon  nila sa buhatan sa DSWD-7 pinaagi sa pag-text sa 09183122813. (BANAT NEWS)